Shekulli 21- Shekulli i Internetit? Shekulli iInterneti (ende) paparashikueshmërisë!
Tag Archives: Interneti
01/01
Të kalosh mesnatën e ndërrimit të viteve në gjumë… a dmth. që ke fjetur një vit? Dhe çfarë është edhe më keq (apo edhe më mirë?), që edhe tërë viti në të cilin hyn do të të kalojë në gjumë?
Ditë pushimi e leximi. Ditë shëtie e qetësie.
Dhe dita në të cilën krejt papritur në Netflix bie në duart e Werner Herzog.
Dhe në filmin Lo and Behold, Reveries of the Connected World.
Çfarë të them për këtë mjeshtri të gjermanit të amerikanizuar apo amerikanit me prejardhje gjermane… apo.. thjesht mjeshtrit të madh?
Asgjë: sepse vetëm sprova e tij për t’i gjetur zanafillën internetit- pa teori konspiracioni e tam-tam-a shkencash, por me një dorëshkrim prej 10 kapitujsh, biseda me dhjetëra pionierë- gjeni e viktima, të çmendur e vizionarë, viktima e fitimtarë të internetit- e bën këtë vepër kaq unike. Dhe të papërsëritshme.
Sikurse edhe vet internetin.
Për të cilën një nga pionierët e tij.. në bisedën me Herzog, thotë që pas disa dekadash dikush do ta quajë këtë kohën që e jetojmë: mesjeta kaotike e internetit.
Është vetëm fillimi.
Dhe ajo që ky film, personazhet e tij na e thonë është: nuk e dijmë se çfarë do ngjajë me këtë shpikje njerëzore e cila, deshëm nuk deshëm, duhet ta pranojmë, është më e madhe se edhe shpikja e librit…
24 Maj
Në një gazetë shkruan që në bazë të një hulumtimi del që më shumë se gjysma e rinisë mund ta paramendojë jetën pa Zot por jo pa internet.
Të del që ky interneti do të jetë në të vërtetë Zoti të cilin s’e kemi njohur dhe s’e kemi ditur?
3 Maj
Është ajo skena klasike në kioskun e lagjes ku jetoj. Duhet t’i ketë më shumë se 60 vjet. Në vesh ka kufje të cilat janë të formës së MP3 të moçëm. Shitësia vrapon nga qyshku në qyshk, dhe i mbush banakun me revista, revista, revista. Për gra, për pleqëri dhe ajo që çuditë më së shumti edhe për fëmijë.
Sikurse dje dhe të premten e shkuara nga 20 Eurot që i jep shitësi i kthen ca monedha hekuri.
Ku i çon gjithë ato revista?
Vdekja e gazetave dhe gazetarisë?
Megjithatë po. Edhe në Gjermaninë e shpikjes së shtypit, librit.
Nuk ka thënie më të kthjellët sesa ajo e Franz Sommerfeld-it, ish shefit të Koelner Stadt Anzeiger dhe shefit të Shtëpisë Botuese DuMont.
“Gazetarët po e vuajnë fatin e njejtë me atë të priftërinjëve dhe murgjëve pasi u zbulua shtypja e librave. Prej asaj kohe ata nuk ishin më bartësit ekskluziv dhe jo rrallë edhe të dërguarit e Zotit që mund të thoshin fjalët e tij!”.
E ka fjalën për rënien e monopolit të fjalës së shkruar/shtypur. Dhe shpkikjen e internetit.
Sa gra duhet të jenë sot si kjo “fqinja” ime që paguan nga 20 Euro në ditë për gazeta grash….