Tag Archives: Vizat

03/04

Ditar, ,

Një  prej debateve më të shpifura dhe për këtë edhe pështira në moçalin politik të Kosovës është postulati politik: „pa u miratuar Demarkacioni me Malin e Zi Kosova nuk merr liberalizim të vizave!“.

Kur e thonë vendorët, kur e përsërisin ndërkombëtarët nga shteti i vendorëve, kur ua ndihmojnë pjestarët e Shoqërisë Civile, kur ua miratojnë opinionistët dhe kur nuk u kundërvihet askush prej atyre që duhet t’ua thotë : si s’ju vjen turp kur flisni broçkulla!

Prandaj, a duhet të çuditet njeriu kur sheh e dëgjon politikanë të pozitës (PDK, LDK) jo rrallë edhe opozitës (VV!, AAK, NISMA) e bashkë me ta edhe opinionistë sesi tash e më shumë se një vit vazhdojnë të çojnë ujë në mullinjtë e erës së kotësisë kur thonë: pa u miratuar Demarkacioni me Malin e Zi nuk ka liberalizim të vizave.

Këtë e thonë pushtetarët- nga PDK a LDK. Disa prej tyre vërtetë mendojnë naivisht kështu. Disa të tjerë duan ta shesin si një monedhë të mundshme paraelektorale- pamarrparasysh se kur zgjedhjet do të mbahen. Kurse krerët e të dyja këto partive: Hashimi e Isa… me të tjerët… e dijnë  që e vërteta është krejt tjetër. (Por për këtë më vonë).

Në kurthin e budallallëkut të quajtur lapidarizëm i rënies së murit me kokë jo rrallë dijnë të bijnë edhe pjestarë të opozitës (sidomos nga VV! Por aty këtu dhe nga AAK e NISMA) kur deklarojnë: më mirë të izoluar e pa viza sesa të japim tokën tonë për të cilën kemi derdhur gjakun qe sa shekuj.

Maskaradat e podiumeve virtuale apo edhe atyre reale janë për keqardhje. Sepse askush s’don të ballafaqohet me faktin real që Kosovën dhe shtetasit e saj vazhdon t’i mbajë të mbyllur në burgun e pushtetit- pa liberalizim të vizave dhe çka është edhe më keq edhe pa shansin më të vogël për ta marrë vesh se kur do të ngjajë një gjë e tillë.

Shfaqjet bizare si kjo e tryezës së bisedimeve të Partive politike nuk do të duhej të kishin për tematikë temat e “mëdha” siç janë Demarkacioni, Asociacioni, Ushtria etj. por tavolinat si kjo do duhej të ndalen tek vetëm një pikë e rendit të ditës: data dhe koha e çuarjes së vendit në zgjedhje.

Sepse zgjedhjet janë e vetmja zgjidhje për vendin në këtë kohë kur Koalicioni po hyn në përmbylljen e vitit të tretë të tri sukseseve kolosale të cilat në historinë e Kosovës do të quhen edhe vitet e Koalicionit i cili: zgjodhi Isën Kryeministër, aprovoi Gjykatën Speciale dhe katapultoi Hashimin President… dhe dështoi në e me çdo gjë.

Kaq ka qenë detyra e kësaj ngrehine të PDK/LDK-së e cila në mënyrë të dhunshme shkeli çdo parim dhe frymë të demokracisë europiane dhe perëndimore me mënyrën si u zgjodh.

Nuk i them këto që të kthehem atje ku njeriu s’ka nevojë të kthehet… por thjesht të dal tek pika: menjëherë pas jetësimit të këtij koalicioni, për një periudhë prej gjashtë muajsh (tetor 2014/prill 2015) Kosovën e patën lëshuar mbi 80.000 qytetarë. Skenat dramatike të largimit të qytetarëve të vendit drejt sidomos Gjermanisë por edhe Francës e Skandinavisë edhe sot  e kësaj dite janë jo veç trauma për ata që u shpërngulën e në ndërkohë janë kthyer apo vazhdojnë “të luftojnë” për të qëndruar në këto shtete, por ato janë barometri i çdo studimi të kancelarive gjermane, franceze, europiane për situatën politike, ekonomike, sociologjike në shtetin dy milion banorësh.

Dhe vjen pyetja: Kosovës vizat?

Le të dalin e të bëjnë “be” Hashimi e Isa që s’e dijnë!

Por ja që e dijnë prandaj edhe nuk ua thonë: krejt parametrat e “studimeve profilore” të shteteve anëtare të BE-së për Kosovën flasin që në çastin që Republika ta marrë liberalizimin e vizave, për një periudhë kohore prej 6 muajsh, vendin mund ta lëshojnë më shumë se gjysmë milioni banorë. Legalisht dhe me paqartësinë “absolute” se në çfarë mënyre do ta përfillin 90+90 ditëshin për respektimin e regjimit të udhëtimit pa viza.

Arsyeja pse do ta lëshojnë vendin e tyre? Papunësia, paperspektiva, korrupsioni, dëshpërimi…

Prandaj po e provoj me një apel miqësor e njerëzor: sa herë të dëgjoni që politikanët në Prishtinë u flasin për “demarkacion” si “kusht” për vizat dijeni që po ju gënjejnë.

Sa herë të dëgjoni nga europianët që ua përmendin “demarkacionin” (i cili mund të aprovohet me një “demarkacion” në arbitrazh!) dijeni që në mendje e kanë veç një frikë: Migracionin!

Krejt tjerat janë teprica teknologjike prej eteri.

Pos faktit që Kosova duhet të ndryshojë shpejt dhe radikalisht!

Aq sa në BE ta kuptojnë që s’kanë pse frikësohen prej migracionit masiv nga shteti më i varfër, më i korruptuar, më i kriminalizuar… prandaj edhe izoluar i Kontinentit: Republika e Kosovës!

29/03

Ditar,

Nëntorin e vitit të kaluar Kryeministri i atëhershëm (dhe i tashëm) i Gruzisë, Giorgi Kwirikaschwili qëndroi në Berlin si i ftuar i Kancelares së Gjermanisë Angela Merkel. Pos ndikimit dhe frikës nga Cari i Moskës, Putini, tema ishte takimit e shkruar: Kwirikaschwili kërkonte bekimin e Angela Merkel që t’i vërtetonte premtimin që Brukseli Gruzianëve u kishte dhënë: nga dhjetori shtetasit e tij të mund të udhëtonin pa viza në Europë.

Por Angela Merkel i tha “jo”.

Dhe e udhëzoi: shko në vend, organizoi zgjedhjet dhe pas tyre- në pranverë qytetarët e vendit tënd do të udhëtojnë në Europë pa viza. Pa iu trembur syri dhe përkundër rrezikut që gruzianët kanë shkallën më të lartë të kriminalitetit në Gjermani, ajo ia bëri këtë premtim homologut të saj.

Giorgi Kwirikaschwili u kthye në vendin e tij me premtimin në xhep dhe organizoi zgjedhjet të cilat i fitoi.

Nga data 29 Mars Gruzianët udhëtojnë në BE pa viza.

Në Kosovën e vogël, ky lajm mezi u shënua dhe gëlltit.

Nuk ka Qeveri prejse shteti është i pavarur që s’ka premtuar që vitin që “vjen” do të udhëtojnë pa viza.
Bizariteti i situatës në vendin e vetëm të Europës ku 2 Milionë banorë jetojnë si në burg është ky: viza këtë vit nuk ka. Ata që thonë se vizat mund të merren vitin që vjen mashtrohen ose nuk e dijnë: nëse zgjedhjet nuk mbahen këtë vit, atëherë një Kancelare (Merkel) ose Kancelar (Schulz) do të kërkonin vitin që vjen “zgjedhje” demokratike.

Prandaj sa më shpejt që do të mbahen zgjedhjet e përgjithshme aq më mirë do të jetë për Kosovën. Sepse ky vend nuk ka patur kurrë Qeveri më të dobët dhe më jo efikase. Arritjet e saj mund të numërohen në tri: Zgjedhja e Isa Mustafës Kryeministër, Blerja e postit të Hashim Thaçit për President (me Terminale, Ambasadore/ë… e çka jo tjetër) dhe votimi i Gjykatës Speciale.

Çdo gjë tjetër që kjo Qeveri ka prekur ka dështuar.

Në Demarkacion, Dialog, luftë korrupsionit, zbutje të papunësisë e varfërisë…
Dhe çdo Qeveritar që do të dalë ta kërkojë votën me premtime për vende pune apo liberalizim vizash… do të mund ta bëjë këtë gjë: në televizor, në Facebook apo edhe në tubime me të punësuarit e vet. Me popullin në rrugë: jo!

12/02

Ditar, ,

1.

Dhe papritmas çelet fronti i vizave.

Kosova e poshtëruar dhe mjerë. Kosova e cila e ka humbur frymën e fundit të shpirtit dhe lirisë, jetës dhe shpresës.

Një të dielë zgjohet dhe e sheh veten ashtu siç edhe është: e strukur dhe frikësuar.

Pastaj hedhet në eterin e gjetjes së shkaqeve pse qytetarët e saj s’mund të lëvizin të lirë si krejt qytetarët, shtetasit e Europës. Dhe jo vetëm.

Shkasi:dy shtetas të kësaj Kosove, pjesëtarë të shoqërisë civile s’kanë marrë viza për dy aktivitete kulturore.

2.

Kur ua thosha… Do të më duheshin dy deri në tre minuta të hyj në këtë arkiv dhe t’i gjej krejt tekstet e fillimvitit të kaluar kur u thosha: Isa dhe Hashimi, Hashimi dhe Isa… po u gënjejnë se sivjet s’ka viza për qytetarët e Kosovës. “Sivjet” ishte viti 2016. Për vitin 2015 s’po flas fare… Për më herët jo se jo!

Nuk isha i vetmi.

Por, isha nga të paktët, shumë të paktët që e dinte dhe thoshte atë që edhe këta e dinin por s’donin ta thoshin.

Dhe kjo dijeni nuk vinte as si pasojë e  “informatave” prej shoferave të ambasadave të Prishtinës as “miqve” të “huaj”… por thjesht nga kollazhi i krejt të këqijave që Kosova po i bënte vetes prejse në krye të saj u kthyen dy partitë e mëdha (PDK+LDK) të cilat në fillimin e tyre të ri nga Dhjetori i 2014 filluan fundosjen përfundimtare të Kosovës.

Është fundosje sepse prej kësaj Qeverie, i pëlequ Isës a jo, s’pat dhe s’ka asnjë të mirë. Pos fshirjes së borxheve për qytetarët (punë të cilën Isa do ta kishte bërë edhe vet më mirë sesa sozia e tij Avdullahu) Qeveria e Koalicionit PDK+LDK nga Kosova i hodhi në azil 7/80.000 njerëz- mes tyre edhe familjarë të Kryeministrit e Zv/kryeministrave, Kushërinjë e bashkëfshatarë të së paku katër Ministrave, Kryetarëve të degëve të PDK e LDK në krejt Kosovën.  “Azilkërkuesit” nga Kosova që nuk ikën as nga lufta as nga përndjekja politike ikën edhe nga lufta edhe nga përndjekja politike. E klasave politike të korruptuara prej pas luftës të cilat u kanë mbyllur derën edhe familjarëve të tyre vetëm e vetëm që vet të prehen në gjiun e korrupsionit dhe krimit të organizuar.

Tani: një vend që i thonë Kosovë që Gjermanisë e Francës ia dhuron 7/80.000 në vitin e krizës më të madhe të refugjatëve të luftës… të shpresojë për liberalizim vizash, kjo po që është çmendi.

Ashtu siç është më shumë se pafytyrësi kur popullit provohet t’i shiten fajtorët për këtë dështim gjigand.

Mos u besoni kurrë që Demarkacioni e Asociacioni janë parakushte për liberalizim të vizave.

Mos u besoni sepse po ju gënjejnë dhe duan ta fshehin dështimin e tyre. Dështim që kap një periudhë kohore prej 27 vitesh LDK e 17 vitesh PDK!

Mos u besoni sepse çdo gjë që ka të bëjë me liberalizimin e vizave lidhet para së gjithash me luftimin e korrupsionit në njërën anë dhe frikën e arsyeshme të Holandës (në Mars), Francës (në Prill) dhe Gjermanisë (në Shtator) që gjysma e Kosovës do t’ia mësyejë Europës- poqese do t’i liberalizohen vizat.

Mos u besoni sepse si këto tre shtetet e lartpërmendura ashtu edhe krejt tjerat të Europës e dijnë mirë: ky popull i lodhur dhe poshtëruar duhet të bie aq shumë përtoke saqë duhet ta gjejë fuqinë të çohet (në këmbë) dhe të çlirohet nga kriminelët që e qeverisin në mënyrë që ta sheh shpresën së pari në vendin e vet! Dhe jo (me ikje në) Europë!

 

3.

Këtë fillimvit dua ta bëj edhe një prognozë për liberalizimin e vizave për qytetarët e Kosovës.

Edhe kjo vjen pa kredi por edhe pa informata prej shoferave të ambasadave e “miqve” të huaj: shtetasit e Republikës së Kosovës nuk do të marrin liberalizimin e vizave me këtë Qeveri të drejtuar prej Isa Mustafës. As sot, as nesër as pasnesër. Sa më shpejt që e kuptojnë njerëzit e këtij vendi aq më mirë për ta!

 

 

5 Korrik

Ditar,

Shumë nga ata që ishin para kohës së tyre, duhej të prisnin në një banesë shumë të pakëndshme. Kështu thotë Jerzy Lec.

Nuk është se e ndjej veten të vërtetuar me këtë mendim të Lec-it. Por derisa lexoj sesi njerëzit nga Kosova këtë vit nuk do lëvizin pa viza në Europë ndjej keqardhje për ta. Por edhe për veten që para muajsh provoja t’ua prishja festatat virtuale kur u thoshja që s’do lëvizin të lirë… Ashtu e kështu kjo punë dihej.

10 Qershor

Ditar, , ,

Nuk mund ta lë këtë punën e vizave pa e përfunduar: nuk ka viza as këtë vit e as vitin që vjen- deri në vjeshtë.

Dhe kjo sepse thjesht gjermanët janë keq me turqët. Francezët s’i duan gjeorgjianët. Dhe të dy këta të mëdhenjë u tuten shqiptarëve të Kosovës që do të mësyejnë masovikisht drejt Evropës.

Vitin që vjen ka zgjedhje- në Francë e në Gjermani. Pa u kryer këto zgjedhje… s’ka asgjë.

Kur jemi tek Franca (e Gjermania): sonte fillon futbolli. Do t’i harrojmë vizat për ca javë!

9 Qershor

Ditar, , ,

Ditët kalojnë dhe njeriu papritmas vetëm kur ndërron moti mirë e mirë e sheh veten… në verë.

Në mbrëmje lexoj për një zv/Ministër të Kosovës që thotë se deri në fund të vitit 2 milion njerëzit e vetëm të Kontinentit që s’munden të udhëtojnë pa viza as këtë vit nuk do ta kenë këtë, çfarë t’i them, privilegj? Sepse për krejt kontinentin është një normalitet.

Është shefi i këtij Zv/Ministrit, që i bie, jo Ministri por Kryeministri i Kosovës, Isa, të cilin më nuk e njoh, ai që thotë jo… do të udhëtojnë qytetarët e Kosovës në Evropë pa viza. Në vjeshtë. Në vjeshtën e vitit që shkoi thoshte se do të udhëtojnë në fund të vitit (të kaluar). Në pranverë thoshte që do të udhëtojnë në Verë pa viza. Dhe tash në verë thotë se do të udhëtojnë në vjeshtë pa viza.

Rrjedhimisht, në vjeshtë, kur nuk do të ngjajë ky udhëtim, do t’u thotë që do të udhëtojnë në dimër pa viza.

Mirë ua bën. Qytetarëve.

Sepse nuk janë qytetarë.

Sepse po të ishin qytetarë të vërtetë dhe të mirëfilltë, do ta kishin ndjekur me dajak prej aty ku është ulur. Por s’janë qytetarë. Janë robë që kënaqen me atë që kanë mbi ta.

Dhe këtë e din ky Isa.

Ciniku që ka fytyrë t’i rren sa herë që flet. Jo veç për viza. Por për çdo gjë që u kishte premtuar.

Çdo popull e ka regjimin që e meriton. Kaq.

 

P.S.

Kam ngrënë dajak disa herë- edhe nga miq të mirë në Prishtinë… sa herë u thoshja dhe shkruaja që s’ka viza sivjet. Doja t’i ballafaqoja me një fakt.

4 Maj

Ditar, , ,

Java e Kosovës.  Shteti më i ri dhe shteti më i izoluar por edhe korruptuar në Evropë pranohet në UEFA dhe më në fund vjen edhe vendimi i “Qeverisë” Europiane që të rekomandohet liberalizimi i vizave për qytetarët.

UEFA i hap rrugën vendit për pranim në FIFA. Rekomandimi i Komisionit Europian hap rrugën që Parlamenti Europian dhe Ministrat e Brendshëm të BE-së (Schengenit) të votojnë për datën dhe me këtë edhe ditën e udhëtimit të qytetarëve pa viza.

Këto dy padrejtësi të mëdha që u janë bërë qytetarëve të Kosovës i shoh dhe para së gjithash ndjej si gëzim për miqtë e të afërmit në Kosovë. Në shkronja, fotografi, mesazhe e urime…

Me të drejtë.

Po të mos ishte ky skepticizmi që kam: mirë kështu… por çfarë të bëhet me hapjen e kutisë së pandorës. Të jesh në FIFA dmth. të kesh para edhe logjistikë (stadiume, terrene sportive, skuadra…).  Të kesh mundësi për udhëtim dmth. të kesh edhe punë, para, motiv të udhëtosh në Europë.

Ironia e madhe: klasa politike e cila vetes ia atribuon këto suksese. Askush nuk pyet për vonesat e deritashme. Dhe askush nuk pyetet sa të vështira do të jenë këto shtegtime drejt barazimit të vërtetë, të mirëfilltë, me rajonin dhe Evropën.

Ndoshta edhe më mirë që s’pyetet askush.

Sepse përgjigje nuk ka. Dhe do të duhen vite derisa ajo të gjindet.

Learing by doing. Duke parë, duke bërë…